دورة عقيدة الزهرة المسلمة ( 2 )

 

دورة عقيدة الزهرة المسلمة ( 2 )

 

وحشتوني يا زهراتي
ان شاء الله نكمل مع بعض حديثنا وهنتكلم النهاردة عن حاجة مهمة وهي :

معرفة الأصول الثلاثة

يجب علينا معرفة ثلاثة أصول أو حاجات أساسية علشان نكون مسلمين صح
معرفة الرب تعالى، والدين، والرسول


الصل الأول: معرفة الربّ.
لازم أكون عارفة إن :

1- ربي الله الخالق المالك المدبِّر.
قال تعالى : ( الله خالق كل شيء ).

2- وإني أعرف ربي بآياته ومخلوقاته.
قال تعالى: ( ومن آياته الليل والنهار والشمس والقمر ).

3- وأن الله هو المعبود المستحق للعبادة وحده لا شريك له. ومحدش غيره سبحانه وتعالى يستحق العبادة
قال تعالى: ( يا أيها الناس اعبدوا ربكم الذي خلقكم والذين من قبلكم لعلكم تتقون )

ممكن واحدة تقولي وده كلام ؟ما كلنا بنعبد ربنا سبحانه وتعالى
الحمدلله يا جميل بس هل بتعبديه صح ؟ هل بتخافي من ربنا سبحانه وتعالى زي ما بتخافي من والدك او ناظر المدرسة ؟
هل بتخافي تعملي المعصية قدامهم وبتعمليها عادي وانتي عارفة إن ربنا شايفك وبيراقبك وعارف بتعملي إيه ؟
هل بتسمعي كلام ربنا سبحانه وتعالى وتنفذيه على طول ولا بتاخدي اللي يعجبك واللي مش عايزاه تقولي مش دلوقتي بعدين ابقى أعمله؟



تعالي نعرف يعني إيه عباده ؟
العبادة اسم جامع لكل ما يحبه الله ويرضاه من الأقوال والأعمال الظاهرة والباطنة
كتير مننا بيظن ان العبادة هي الصلاة والصوم والزكاة والحج وقراءة القرآن وبس
لكن الحقيقة ان كل حاجة في حياتنا عباده لو أخلصنا نيتنا لله سبحانه وتعالى

يقول تعالى : " قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّـهِ رَبِّ الْعَالَمِين "َ

مش تبسمك فى وجه أخيك صدقة ؟
يبقى تبسمك عبادة

انك تبري والديك وتسمعي كلامهم عباده

انك تبقي صادقة ومتكدبيش عباده

انك متغشيش في الامتحان عباده

انك مترميش حاجة في الشارع عباده

يعني أي حاجة ربنا سبحانه وتعالى بيحبها تبقى عباده
وفي المقابل اي حاجة أمرنا إننا نتركها لازم نبعد عنها



تعالوا أسألكم كده شوية أسئلة وعارفة انكم كلكم ممتازين وعارفين الإجابة

س1: لأي شيء خلقك الله؟
ج1: خلقني لعبادته، كما قال تعالى: ( وما خلقت الجن والإنس إلا ليعبدون ).
يعني ربنا سبحانه وتعالى مخلقناش علشان نلعب أو نفضل نعيش في الدنيا كده وخلاص
لأه
ربنا خلقنا علشان نعبده
اه ممكن نلعب ونعيش حياتنا في حاجات حلال لكن هدفي الحقيقي في الحياة هو عبادة ربنا علشان ادخل الجنة
لازم ده يكون هدفي الأول في حياتي


س2: ما عبادته؟
ج 2: عبادته توحيده وطاعته.
يعني اني أعبده وحده من غير ما أشرك معاه أي شيء وأطيعه في كل حاجة يؤمرني بيها

وشرحناها قبل كده في معنى العبادة



س3: ما معنى لا إله إلا الله؟
ج 3 معنى لا إله إلا الله: لا معبود بحقٍّ إلا الله.

يعني هنلاقي ناس كتيرة بتعبد شجر وحجر وأصنام وحاجات كتيرة
لكن الوحيد اللي يستحق العباده وانك تصلي وتصومي وتعملي كل العبادات ليه هو الله سبحانه وتعالى اللي خلقك وانعم عليكي


نكمل المرة القادمة بإذن الله


الواجب:
س1 : ماهي الأصول الثلاثة ؟

س2: ماهي العبادة ؟

س3: لأي شيء خلقك الله ؟