أحلى حياة في طاعة الله ... تفسير سورة النور 2

 

الدرس الثاني

الحلوين أخبارهم ايه ؟
وحشتوني


يارب تكونوا مستمتعين بحفظ سورة النور

وإن شاء الله النهاردة هنحفظ وجه مهم جدا وفيه قصة مشهورة حدثت لأم المؤمنين عائشة رضي الله عنها وهي حادثة الإفك



حد عارف إيه هي حادثة الإفك ؟

مين رافع ايده هناك



ها أقول ولا واحدة فيكم هتقول ؟

عارفة إنكم كلكم عارفينها لكن نقولها على السريع علشان نفتكرها مع بعض

في طريق العودة من غزوة بني المصطلق كانت أم المؤمنين عائشة رضي الله عنها مع الرسول صلى الله عليه وسلم في الغزوة ، وكان زمان النساء في السفر بيحطوا ليها هودج يقعدوا فيه فوق الجمال فأم المؤمنين عائشة نزلت من الهودج ولما رجعت ملقتش العقد بتاعها فنزلت تدور عليها وكان وزنها خفيف فلما الرجال حملوا الهودج علشان يحطوه على العبير محسوش انها مش موجودة فيه
ومشي الجيش من غير أم المؤمنين عائشة رضي الله عنها ورجعت ملقتش الجيش فقعدت يمكن يحسوا بغيابها ويرجعوا ياخدوها
لكن كان فيه صحابي اسمه صفوان بن المعطل السلمي لسه ممشاش لانه كان بيفضل بعد مكا الجيش يمشي يشوف لو حد نسي حاجة فياخدها لأصحابها فشافها فركبها على بعيره ووصلها للمدينة
واستغل المنافقين الموضوع ده وعلى رأسهم زعيمهم عبد الله بن ابي سلول واتهم أم المؤمنين في عرضها
وشاركه ثلاثة من المسلمين هم مسطح بن أثاثة، وحسان بن ثابت، وحَمنة بنت جحش ..
فاتُهِمت ـ أم المؤمنين ـ عائشة ـ بالإفك..

وطبعا ده أذى النبي صلى الله عليه وسلم كثيرا وأعلن ثقته في زوجته وصفوان بن المعطل وإن ده مش ممكن يكون حصل
ومرضت أم المؤمنين عائشة رضي الله عنها بسبب الإشاعة دي ، وانقطع الوحي عن الرسول صلى الله عليه وسلم شهر كامل ، ثم نزل الوحي ليبرئ ام المؤمنين عائشة رضي الله عنها من فوق سبع سماوات

وكان في حادثة الإفك دروس كتيرة جدا منها في ناس طلعوا منها 100 فائدة :
هناخد بس كام واحدة سريعة


1- التثبت من الأقوال قبل نشرها
شوفتوا إشاعة عملت ايه ؟ وازي لوثت سمعت إنسنة بريئة وخلتها تمرض وقلبت حياتها وحياة كل اللي حواليها ؟

2- وضحت الأيات نعمل ايه لما نسمع اشاعة
وهي إننا نظن الخير بالناس وندافع عنهم لأتنا عارفينهم ومعاشرينهم وعارفين ان ده لا يمكن ان يصدر منهم
( لَوْلاَ إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنْفُسِهِمْ خَيْرًا وَقَالُوا هَذَا إِفْكٌ مُّبِينٌ)


ونطلب الدليل على الكلام ده والشهود والا نعتبر اللي ناقل الكلام ده كاذب
( لَوْلاَ جَاءُوا عَلَيْهِ بِأَرْبَعَةِ شُهَدَاءَ فَإِذْ لَمْ يَأْتُوا بِالشُّهَدَاءِ فَأُولَئِكَ عِنْدَ اللهِ هُمُ الْكَاذِبُونَ )



مننقلهوش مادام مش متأكدين منه

( إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُمْ بِهِ عِلْمٌ وَتَحْسَبُونَهُ هَيِّنًا وَهُوَ عِنْدَ اللهِ عَظِيمٌ

وَلَوْلاَ إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَذَا سُبْحَانَكَ هَذَا بُهْتَانٌ عَظِيمٌ)


3- حرص الإسلام على عدم نشر الفاحشة وغلق اي حاجة ممكن تؤدي ليها


(إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ وَاللَّهُ يَعْلَمُ وَأَنْتُمْ لا تَعْلَمُونَ)
فالآية الكريمة اشتملت على تحريم إشاعة الفاحشة بين أهل الإيمان. و بيان عاقبةِ مَن أشاع الفاحشة في الذين آمنوا.