دورة عقيدة الزهرة المسلمة ( 3 )

 

دورة عقيدة الزهرة المسلمة ( 3 )

 

ازيكم يا حلوين وحشتوني
نكمل الأصول الثلاثة
فاكرين الأصل الأول أخدناه المرة اللي فاتت
اوعو تكونوا نسيتوه

تمام كده برافو عليكم
معرفة الرب

نكمل بقى بقية الأصول





الأصل الثاني : معرفة الدين.
عايزين نعرف يعني ايه دين الاسلام

الإسلام هو : الاستسلام لله بالتوحيد والانقياد له بالطاعة والخلوص من الشرك

يبقى الإسلام هو إني أستسلم لأوامر الله وأنقاد ليها وأطيعه في كل أوامره وأبعد عن كل ما نهى عنه وتكون أعمالي كلها خالصة من الشرك
قال تعالى: {ومن احسن دينا ممن أسلم وجهه لله وهو محسن}النساء
لازم طاعة الله تكون رقم واحد في حياتك وتخافي من الله سبحانه وتعالى ومن عقابه أكتر من خوفك من أي إنسان

مين مننا بيخاف من والده أو والدته أكتر من خوفه من ربنا سبحانه وتعالى ويبقى عنده استعداد يكذب علشان والده ميعاقبهوش وناسي إن ربنا سبحانه وتعالى شايفه ومطلع عليه وهيعاقبه وعقابه أكبر بكتير من عقاب والده ؟

مين مننا بلغت و الحجاب بقى فرض عليها ووالدتها تقولها إنتي لسه صغيرة وتسمع كلامها علشان متغضبش والدتها لكن عادي عندها تغضب ربنا؟
نقولك لأه يا جميل
لا طاعة لمخلوق في معصية الخالق
بس مش معنى كده تروحي تكلمي والدتك بشدة
نبين ليها حكم الشرع وبكل أدب وذوق ونطيع أمر الله سبحانه وتعالى





والإسلام هو الدين الذي ارتضاه الله للناس جميعا.
قال تعالى: { ورضيت لكم الاسلام دينا }المائدة
وكل رسالات الأنبياء كانت تدعو للإسلام





والإسلام هو دين الخير والسعادة والسرور.
قال تعالى:
{ بلى من أسلم وجهه لله وهو محسن فله اجره عند ربه ولا خوف عليهم ولا هم يحزنون} المائدة
فلو عايزة السعادة في الدنيا والآخرة وعايزة الخير هتلاقي كل ده في التزامك بإسلامك وتعاليمه



نسأل بقى اسئلة يا شاطرين

س1: كم أركان الإسلام؟ وما هي؟
ج1: أركان الإسلام خمسة وهي:
1- شهادة أن لا إله إلا الله وأن محمدا رسول الله.
2- إقام الصلاة.
3- إيتاء الزكاة.
4- صوم رمضان.
5- حج بيت الله الحرام مع الاستطاعة.


طيب عارفين يعني إيه أركان ؟
انتم عارفين اركان الغرفة
ينفع يبقى في غرفة من غير أركان ؟
استحالة طبعا

وكمان الإسلام ما ينفعش نفرط في أي ركن من أركانه
لازم أقول الشهادتين واصلي واصوم وأزكي وأحج لو قدرت اني أحج لما اكبرعلشان أكون مسلمة


وطبعا عارفين إني علشان أدخل الإسلام لازم أقول الشهادتين

طيب الصلاة لو سبتها هكون مسلمة ولا لأه؟
طبعا اللي يترك الصلاة وهو مش معترف ومنكر إن فيه حاجة اسمها صلاة ده كافر
والحمد لله كلنا معترفين ومؤمنين بالصلاة

لكن المهم اللي بيترك الصلاة كسلا وتهاونا ده حكمه إيه؟
بعض العلماء قالوا إن اللي بيترك الصلاة كسل وتهاون يبقى كاااااااااافر
وبعضهم قال ميبقاش كافر لكن ذنبه كبير

اللي مش بتصلي ترضى لنفسها إن يبقى بعض العلماء يقولوا عليها ان اللي بتعمله ده كفر؟


أما بقية الأركان الصوم والزكاة والحج اللي بيتركها مش كافر لكن عمل كبيرة من كبائر الذنوب


سلام يا حلوين ونكمل المرة الجاية ان شاء الله

الواجب :
س1: عرفي الإسلام؟
س2: ماحكم ترك الصلاة كسلا وتهاونا ؟