الخلاف وارد فلنتقبل رأي الآخر ونحترمه مادام معه دليل
اسمحولي أتكلم معاكم في حاجة لاحظتها بكثرة في مواضيع كتيره
على سبيل المثال لا الحصر مواضيع
حكم تغطية الوجه
حكم النمص للزوج
حكم صلاة التسابيح
حكم صلاة الحاجة
وغيرها كتير
لو واحدة كتبت رأي ومعاه فتوى تؤيده
تبدأ المعركة والخناقات وسيل الاتهامات وأحيانا التجريح كمان وبتختم بغلق الموضوع غالبا أو على الأقل حذف مشاركات كتيره منه
أنا هتكلم كلام عام دون الخوض في تفاصيل الفتاوى والأدله ومين رأيه راجح على رأي التاني
لازم نتفق على حاجة وهي ان الخلاف وارد نتيجة الاختلاف في فهم النصوص
يعني مثلا في مسألة الخلاف بين الأئمة في موضوع ولاية المرأة لنفسها في الزواج
كلهم دليلهم نفس الآية بس الامام ابو حنيفة فهمها بشكل والأئمة الأربعة فهمومها بشكل تاني
يقول تعالى : " فلا تعضلوهن أن ينكحن أزواجهن "
أبو حنيفة قال في الآيه نهي الأولياء عن منع النساء أن ينكحن من يخترنه وانما يتحقق المنع ممن في يده الممنوع وهو الإنكاح ، وإلا فلو لم يكن في يد المرأة فكيف يمنعها منه الولي ؟
دي وجهة نظره بناء على تفسيره للآية وأدلة أخرى مش وقت الحديث عنها
الجمهور قال لأه فمثلا الشافعي قال في الآية دي : وهذا أبين مافي القرآن من أن للولي مع المرأة في نفسها حقا
شوفتم سبحان الله نفس الآية أخدنا منها الحكم وعكسه
ولو فتحتي باب الفقه المقارن هتلاقي المسألة الواحدة الأئمة الأربعة كل واحد ليه رأي وتلاميذهم كمان ليهم آراء مختلفة قد تكون مخالفة لأئمتهم وكل واحد فيهم عنده دليله
كوني على مذهب معين فهذا لا ينفي وجود مذاهب أخرى لها آراء أخرى وعليها أدلتهم ومن حق غيري أن ياخد برأي المذهب الآخر مادام عليه الدليل ومادام الامام ثقة ولا اثم عليه حتى لو أخطأ وإلا نلغي المذاهب الأربعة بقى ونكتفي بمذهب واحد بس
لازم نتعلم نحترم رأي المذهب الآخر ونحترم اختيار الآخرين لمذهب معين ولو كنت أرى انه بخلاف الدليل اللي مقتنعه بيه
يقول الإمام الشافعي: «رأيي صواب يحتمل الخطأ، ورأي غيري خطأ يحتمل الصواب»
ولما الامام الشافعي ذهب للعراق صلى على مذهب ابي حنيفة رغم انه على خلاف مذهبه احتراما أبي حنيفة
لو ادركنا النقطة دي هنستريح كلنا
بس الفيصل العالم يكون ثقة ومعه الدليل
يعني منقولش جمال البنا قال ومعاه دليل يبقى نعمل بيه لأه طبعا ده مش ثقة وكلنا عارفين
انا بتكلم عن الأئمة الأربعة
وهتلاقي غيرهم كمان زي ابن حزم الظاهري والنووي وابن تيمية وابن القيم وغيرهم من علماء سلفنا الثقة
بس خلينا دلوقتي في الأئمة الأربعة مش هدخلكم في متاهات
النقطة التانية
لو درستي أصول فقه وهو علم استنباط الأحكام من الدليل
هتلاقي فيه قرائن تخلي الأمر الوارد في الحديث على سبيل الاستحباب او الوجوب مثلا
أو هل النهي للتحريم أو الكراهة
ومش بيشوفوا آية واحدة ولا حديث واحد ويقوموا قايلين الحكم
لأه
دول بيشوفوا كل الآيات والأحاديث الواردة في الموضوع بسندها
ولو شافوا تعارض ليهم طرقهم في الجمع بين الأدلة
برضه في الحديث بعضهم قال منعملش بالحديث الضعيف نهائيا
وبعضهم قال نعمل بيه في فضائل الأعمال والترغيب والترهيب فقط
ويرى بعض العلماء أنه يجوز العمل بالأحاديث الضعيفة في الحلال والحرام والفرض والواجب والفضائل والترغيب والترهيب وغيرها ولكن بشرطين
أ / أن يكون ضعفه غير شديد
ب / أن لا يوجد في الباب غيره وأن لا يوجد معارض له أصح منه
موال طويل يطول شرحه وعلم واسع أغلبنا منعرفش عنه حاجة
يعني مش انا ولا انتي اللي هنروح نعدل على الأئمة الأربعة ولا على العلماء
ده اختصاص العلماء
نحن مقلدين متبعين ولسنا مجتهدين
من حقك تدافعي عن رأيك ودليلك وتحببي الناس فيه وتقنعيهم بيه
لكن مش من حقك تجبري غيرك على مذهبك وتتهميهم لمجرد إنهم خالفوا مذهبك
انتي دلوقتي بتنقلي المذهب أو الكلام اللي شيخك قاله
مش معنى ده إن محدش قال غير الكلام ده أو ان مفيش رأي تاني في الموضوع
الوقت اللي بنضيعه في الخلاف والمشاحنات بسبب المواضيع دي لو هدفنا الوصول للحق
يبقى ممكن نقضيه في طلب العلم والبحث حول المسالة دي ونعرف رأي المذاهب الأربعة في المسالة
وبعد كده كل واحد يعمل بالدليل اللي اقتنع بيه ومحدش يحجر على اختيار الآخر
عايزين الأمة تتوحد مش تتفرق وتتخانق وتتخاصم في فروع لأن مفيش خلاف في اصول الشريعة إطلاقا
أتمنى يكون كلامي خفيف عليكم ومحدش يزعل مني
بارك الله فيكم جميعا ورزقنا واياكم الحرص على رضاه وتحري الحلال والأصوب في كل أقوالنا وأفعالنا
تعليقات
إرسال تعليق