على دربهم أسير ... عبد الله بن عمرو بن العاص

 



هنتكلم النهاردة عن صحابي جليل وابن صحابي جليل
أسلم قبل أبيه،كان بينه وبين أبيه ثلاث عشرة سنة ، و استأذن النبي في كتابة ما يسمع منه، فأذن له رسول الله.

عرفتوه ولا لسه ؟ ها مش عارفينه ؟

مستنية اجابة بسرعة ، بالظبط كده الله يفتح على اللي جاوبت الإجابة الصحيحة

عبد الله بن عمرو بن العاص



نعرف عنه معلومات سريعة قبل ما نتكلم عن قصة اليوم :

هو عبد الله بن عمرو بن العاص ، وكنيته أبو عبد الرحمن، وأمه ريطة بنت منبه بن الحجاج السهمي. يقال: كان اسمه العاص، فغيّره النبي صلى الله عليه وسلم . وكان محبا للجهاد وكان على علم بالقران وتفسيره وروى الكثير من الأحاديث عن رسول الله صلى الله عليه وسلم تُوُفي سنة خمس وستين من الهجرة .

وكان عبد الله الصحابي الوحيد الذي يكتب الحديث خلف رسول الله. روي عنه أنه استأذن النبي صلى الله عليه وسلم فقال: (( يا رسول الله أكتب ما أسمع في الرضا والغضب ؟؟ قال: نعم فإني لا أقول إلا حقا.)) وقال أبو هريرة : ((ما كان أحد أكثر حديثاً مني عن رسول الله، إلا عبد الله بن عمرو فإنه كان يكتب ولا أكتب)).



شوفتوا حرصه على إنه يسمع حديث رسول الله صلى الله عليه وسلم وإنه يكتبه ؟
وإنتي حريصة إنك تعرفي حديث رسول الله صل الله عليه وسلم وتحفظيه وتعملي بيه ؟
يا ترى منزلة حديث رسول الله صلى الله عليه وسلم في حياتك إيه ؟
حافظة كام حديث؟
ليه مش بنهتم بالحديث زي اهتمامنا بالقرآن ؟
فيه ناس بتقرأ ورد يومي من القرآن أو بتحفظ قرآن لكن مش بيخطر في بالها تحفظ احاديث رسول الله صلى الله عليه وسلم وتتعلم منها .


ودلوقتي تعالوا نقرأ قصة اليوم كما يرويها أنس بن مالك رضي الله عنه

عن أَنَسُ بْنُ مَالِكٍ قَالَ كُنَّا جُلُوسًا مَعَ رَسُولِ اللَّهِ صَلَّى اللَّهُ عَلَيْهِ وَسَلَّمَ فَقَالَ يَطْلُعُ عَلَيْكُمْ الْآنَ رَجُلٌ مِنْ أَهْلِ الْجَنَّةِ فَطَلَعَ رَجُلٌ مِنْ الْأَنْصَارِ تَنْطِفُ لِحْيَتُهُ مِنْ وُضُوئِهِ قَدْ تَعَلَّقَ نَعْلَيْهِ فِي يَدِهِ الشِّمَالِ فَلَمَّا كَانَ الْغَدُ قَالَ النَّبِيُّ صَلَّى اللَّهُ عَلَيْهِ وَسَلَّمَ مِثْلَ ذَلِكَ فَطَلَعَ ذَلِكَ الرَّجُلُ مِثْلَ الْمَرَّةِ الْأُولَى فَلَمَّا كَانَ الْيَوْمُ الثَّالِثُ قَالَ النَّبِيُّ صَلَّى اللَّهُ عَلَيْهِ وَسَلَّمَ مِثْلَ مَقَالَتِهِ أَيْضًا فَطَلَعَ ذَلِكَ الرَّجُلُ عَلَى مِثْلِ حَالِهِ الْأُولَى فَلَمَّا قَامَ النَّبِيُّ صَلَّى اللَّهُ عَلَيْهِ وَسَلَّمَ تَبِعَهُ عَبْدُ اللَّهِ بْنُ عَمْرِو بْنِ الْعَاصِ فَقَالَ إِنِّي لَاحَيْتُ أَبِي فَأَقْسَمْتُ أَنْ لَا أَدْخُلَ عَلَيْهِ ثَلَاثًا فَإِنْ رَأَيْتَ أَنْ تُؤْوِيَنِي إِلَيْكَ حَتَّى تَمْضِيَ فَعَلْتَ قَالَ نَعَمْ قَالَ أَنَسٌ وَكَانَ عَبْدُ اللَّهِ يُحَدِّثُ أَنَّهُ بَاتَ مَعَهُ تِلْكَ اللَّيَالِي الثَّلَاثَ فَلَمْ يَرَهُ يَقُومُ مِنْ اللَّيْلِ شَيْئًا غَيْرَ أَنَّهُ إِذَا تَعَارَّ وَتَقَلَّبَ عَلَى فِرَاشِهِ ذَكَرَ اللَّهَ عَزَّ وَجَلَّ وَكَبَّرَ حَتَّى يَقُومَ لِصَلَاةِ الْفَجْرِ قَالَ عَبْدُ اللَّهِ غَيْرَ أَنِّي لَمْ أَسْمَعْهُ يَقُولُ إِلَّا خَيْرًا فَلَمَّا مَضَتْ الثَّلَاثُ لَيَالٍ وَكِدْتُ أَنْ أَحْتَقِرَ عَمَلَهُ قُلْتُ يَا عَبْدَ اللَّهِ إِنِّي لَمْ يَكُنْ بَيْنِي وَبَيْنَ أَبِي غَضَبٌ وَلَا هَجْرٌ ثَمَّ وَلَكِنْ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ لَكَ ثَلَاثَ مِرَارٍ يَطْلُعُ عَلَيْكُمْ الْآنَ رَجُلٌ مِنْ أَهْلِ الْجَنَّةِ فَطَلَعْتَ أَنْتَ الثَّلَاثَ مِرَارٍ فَأَرَدْتُ أَنْ آوِيَ إِلَيْكَ لِأَنْظُرَ مَا عَمَلُكَ فَأَقْتَدِيَ بِهِ فَلَمْ أَرَكَ تَعْمَلُ كَثِيرَ عَمَلٍ فَمَا الَّذِي بَلَغَ بِكَ مَا قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ فَقَالَ مَا هُوَ إِلَّا مَا رَأَيْتَ قَالَ فَلَمَّا وَلَّيْتُ دَعَانِي فَقَالَ مَا هُوَ إِلَّا مَا رَأَيْتَ غَيْرَ أَنِّي لَا أَجِدُ فِي نَفْسِي لِأَحَدٍ مِنْ الْمُسْلِمِينَ غِشًّا وَلَا أَحْسُدُ أَحَدًا عَلَى خَيْرٍ أَعْطَاهُ اللَّهُ إِيَّاهُ فَقَالَ عَبْدُ اللَّهِ هَذِهِ الَّتِي بَلَغَتْ بِكَ وَهِيَ الَّتِي لَا نُطِيقُ .



ياااااااااااااااااااااااااه
ايه اللي يخلي عبد الله بن عمرو بن العاص إنه يعمل الحيلة دي؟
لأن الجنة هي أكبر أماني ذلك الجيل رضي الله عنهم وأرضاهم

مادام فيه حاجة ممكن تقربه من الجنة أو تعرفه ازاي يدخلها يبقى لازم يعرفها علشان يعمل بيها

هو عايش علشان يوصل للجنة
حياته كلها علشان يوصل للجنة
فيا لها من رغبة جليلة وأمنية سامية ، وياله من جيل ٍ تعجز عن وصفه الكلمات وتخجل أمام وصف بطولاته ومعجزاته وأمنياته العبارات .



طيب وانتي ؟
الجنة بالنسبة ليكي إيه ؟
عملتي إيه علشان تدخلي الجنة ؟
عملتي إيه علشان تبعدي عن النار ؟
كام شهوة وكام معصية تركتيها علشان عايزة الجنة ؟
كام طاعة عملتيها رغم إنها ممكن تتعبك علشان عايزة الجنة ؟

هل اللي بتعصي ربنا وبتلبس بنطلون وبديهات ضيقة وطرح عجيبة وتطلع قصة من تحت الطرحة وتحط مكياج وتعمل حواجبها وتكلم أولاد على النت او في التليفونات وتخرج معاهم وغيره وغيره من الحاجات اللي ربنا حرمها
تبقى حريصة على الجنة وعايزاها ؟
هل كل ده يستاهل إنك تبيعي الجنة علشانه؟



عايزين حبنا للجنة وحرصنا إننا ندخلها الهدف الأول في حياتنا ومفيش حاجة مهما كانت ممكن تبعدنا عن الهدف ده





الواجب:
س1: اكتبي نصيحة لصديقة شيفاها على معصية بإنها لازم تترك المعصية دي علشان تفوز بالجنة .
س2: اكتبي عن أهمية حديث رسول الله صلى عليه وسلم في حياة المسلم ولماذا يجب أن نهتم بحفظه .