مسلسل في كل بيت حكاية .... الحلقة الخامسة
الحلقة الخامسة :
منال ومامتها قاعدين يتكلموا
أم منال :إيه اللي حصل ؟
منال: أنا تعبت خلاص
كل يوم خناق وزعيق كأني معنديش كرامة ، وكأن الواحدة بتتجوز علشان تتهان!
أنا مش أقل منه في حاجة ولازم يسمع كلمتي زي ما بسمع كلمته
وليه أكون درجة تانية وأسمع كلامه وليه يتحكم في حياتي
أم منال : ييييييييييييه
رجعنا لأفكارك دي تاني
منال : احنا مخلصناش علشان نرجع تاني !
أم منال : طيب ايه اللي جد علشان كل ده ؟
منال : الأستاذ بيزعقلي علشان دخل المطبخ لقى أكل الغدا موجود برة ومدخلش التلاجة
وقبلها بيزعقلي علشان ملقاش فوطة ناشفة
أم منال : ومدخلتهوش ليه ؟ ومعلقتيش فوطة ناشفة ليه ؟
مانتي غلطانة يا بنتي
منال : شوفتي أديكي هتدافعي عنه زي كل مرة!!!
أنا مش عارفة انتي أمه ولا أمي ؟
فيها إيه يعني ؟ البنت صغيرة ومش لاحقة أعمل حاجة ، الدنيا مخربتش .
أم منال : يعني عايزاني أقولك ايه أيوه صح عندك حق تتطلقي وتشردي بنتك علشان حاجة هايفة زي دي ؟
منال : هايفة ؟ انتي شايفاها هايفة يعني ؟
انتي ليه مش حاسة بيا !
أم منال : لا حول ولا قوة الا بالله.
رن جرس الباب وقامت تفتح الباب
منال : أم محمد وأم خالد مرة واحدة ايه اللي فكركم بيا ؟
أم محمد : واحنا نقدر ننساك يا جميل ؟ مشاغل بس ، وأدينا جينا
منال : اتفضلوا ده حتى ماما هنا .
شلبية : ايه المفاجأة الحلوة دي ♥
وبعد السلامات والسؤال عن الأحوال والذي منه
أم منال : كويس إنكم جيتم علشان تعقلوا المجنونة دي
منال وهي بتغمز لأمها : ماما مش وقته!
أم منال : هما مش غُرب!
شلبية : خير يا طنط مالها منال ؟
أم منال : أبدا يا بنتي زعلانة من زوجها على حاجات هايفة .
منال غاضبة : لو سمحتي يا ماما دي مش حاجة هايفة
ليه أصلا يعلي صوته عليا ؟
وليه تعتبريني أنا اللي غلطانة دايما وتدافعي عنه ؟
أم محمد : اهدي يا حبيبتي يمكن كان تعبان ولا عنده ضغوط في الشغل والأستاذ حسن راجل طيب وابن حلال ويعرف ربنا وكل الناس بتذكره بكل خير
شلبية : كل يسمع الست العاقلة أم محمد بتتكلم
والست العاقلة الراسية مايجيلها بلهارسيا
منال : ههههههههههههههههههه
ضحكتيني يا شلبية والواحد ملوش نِفس!
أم محمد : استعيذي بالله من الشيطان الرجيم ومتخليش الشيطان يكبر المواضيع
قال رسول الله - صلى الله عليه وسلم - : " إن إبليس يضع عرشه على الماء ، ثم يبعث سراياه يفتنون الناس ، فأدناهم منه منزلة أعظمهم فتنة يجيء أحدهم فيقول : فعلت كذا ، وكذا فيقول : ما صنعت شيئا . قال : ثم يجيء أحدهم فيقول : ما تركته حتى فرقت بينه وبين امرأته . قال : فيدنيه منه ، ويقول : نعم أنت " قال الأعمش : أراه قال : " فيلتزمه "
شوفتي بقى إنك بتفرحي الشيطان ويخليه يوقع بينكم ؟!
وبعدين دي وجهة نظرك في الموضوع يا منال
مش المفروض يا طنط تسمعي كمان من الأستاذ حسن قبل ما تحكمي ؟
وبعدها تحددي منال ولا هو اللي غلطان
أم منال : عندك حق يا بنتي
إن شاء الله لما يرجع من الشغل ليا قاعدة معاه و ربنا يهدي النفوس
أم محمد : يدوبك نقوم نشوف اللي ورانا وانتي اعقلي يا منال
ربنا يهديلك الحال
شلبية : وحشتني لمتنا وكلام أم محمد
بصوا بقى احنا نحدد يوم في الأسبوع نتجمع فيه كلنا وهأقول لبقية الجيران
أم محمد ومنال : ياريت
تسلم الأفكار يا شوشو ♥
************
رجعت شلبية للبيت وفتحت التلفزيون تتفرج علىcbc سفرة
قال يعني هتعمل حاجة من الوصفات في يوم من الأيام
ياريت بس تعمل الأكل يوم من غير ما يشيط منها !.
ورن جرس التليفون وكانت أختها فوزية
شلبية : السلام عليكم ♥
فوزية : وعليكم السلام ورحمة الله وبركاته
شلبية : شكلي بحلم يا ولاد هيغمن عليا
أخيرا زوزو تنازلت ورفع السماعة ؟
فوزية: هههههههههههه
اللي يسمعك يقول إنك مقطعة سلك التليفون من كتر الاتصال
يامفترية تقدري تقولي اخر مرة اتصلتي وسألتي امتى ؟
شلبية : عندك حق ، فعلا الدنيا وخدانا ومخليانا مقصرين
فوزية : إن شاء الله نتقابل قريب علشان مخنوقة ونفسي أفضفض معاكي
شلبية : مالك يا حبيبتي خير ؟
فوزية : لما أجي هأحكيلك ، مش هينفع كلام في التليفون
بوسيلي الولاد وسلميلي عليهم على ما نتقابل إن شاء الله
يا ترى مشكلة فوزية هتكون إيه كمان ؟
حاجة غريبة
هو الكل عنده مشاكل كده ؟
تعليقات
إرسال تعليق