الموضوع طلع كبير وليه علاقة بالعقيدة واحنا مش عارفين !

 

الموضوع طلع كبير وليه علاقة بالعقيدة واحنا مش عارفين !

 

لو بتقري الموضوع الصبح يبقى يا صباح الفل والورد والياسمين
ولو بتقريه بالليل يبقى يا مساء الفل والورد والياسمين



وقبل ما أدخل في الموضوع في حاجتين مهمين لازم نتفق عليها

الأولى : بلاش حدف طوب أصل عواقبه وخيمة وأنا صاحبة عيال

، طماطم ماشي ولو معاه رغيف عيش سخن وحتة جبنة يبقى ألف شكر
وياسلام لو بيتزا ، لو هتحدفوا بيتزا براحتكم خالص



الثاني : عايزين نحط النقط على الحروف ومنخلطش الأوراق ببعضها
ومينفعش نتخلى عن ثوابت الدين علشان أثبت إن الإسلام دين السماحة وقبول الآخر



ديننا بيأمرنا بالبر والاحسان إلى اليهود والنصارى
قال الله - جلّ وعلا - ﴿ لا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ ﴾

وأعطاهم الحق الكامل في إقامة شعائرهم الدينية

بس قالنا إحنا لينا أعيادنا وشعائرنا الخاصة اللي نعتز بيها ونهانا عن الاحتفال بأعيادهم
وده ميزعلش حد زي ما ليهم شعائر من حقهم يتمسكوا بيها
إحنا لينا شعائر من حقنا نتمسك بيها
وهيفضل الود والبر زي ماهو وده اللي أمرنا بيه ربنا

وهسأل سؤال :
هل من العدل إني أقول لغير المسلم قد كفل الإسلام لك حرية اقامة شعائر دينك بحرية تامة
لكن لو قلت معلش من غير زعل مأقدرش أشاركك فيها أكون وحشة وأتهاجم ؟
هل حد قال على النصارى ليه مش بتدبحوا الخروف في عيد الأضحى ؟
كده انتم وحشين وبتعملوا فتنة طائفية ومتشددين ؟

احنا مش هنضحك على بعض في مسألة العقيدة كل فريق مؤمن تماما إن التاني على خطأ
فكل واحد يتمسك بعقيدته وميزعلش لو كل فريق نادى بما يتماتشى مع تعاليم دينه
وهيفضل التعامل بالود والإحسان هو الأساس بينا

لكن ازاي أكون معتقدة ومؤمنة بأن الله واحد أحد ليس له ولد وأرجع أحتفل وأهني بمولد ابنه ؟
تعالى الله عن ذلك



احنا عندنا نقطتين في موضوع راس السنة
الاحتفال والتهنئة
المشكلة إننا حصرنا الموضوع والخناق في تهنئة النصارى ونسينا المصيبة الأكبر وهي الاحتفال

العلماء اتفقوا على تحريم الاحتفال
( يعني ملكيش حجة ولا مهرب ولا سند شرعي لاحتفالك براس السنة لا مع العيلة ولا لوحدك ولا بأي شكل من أشكال الاحتفال ولا زينة ولا شجرة كريسماس ولا هدايا ولا حتى كل سنة وانتي طيبة تقوليها لزوجك وأولادك )


لكن اختلفوا في حكم تهنئة النصارى بين التحريم والجواز
( يعني مش من حقك تحجري على رأي غيرك ولا تسفهي منه ولا تجبريه على الأخذ برأيك لكن من حقك إنك تعرضي الرأي المقتنعة إنه صحيح وتعرضي أدلته وتدافعي عنه بدون تجريح للطرف الآخر )
مع مراعاة حاجة مهمة إن الموضوع ليه علاقة بالعقيدة يعني مش سهل والمفروض اخد بالأحوط

وبما ان الاحتفال متفق عليه خلينا في التهنئة المختلف فيها علشان مأطولش عليكم في الفتاوى
لكن هنا حكم الاحتفال بالتفصيل وسبب التحريم
#2 ندخل على التهنئة
وعلشان ميبقاش كلام من عندي
وعلشان محدش يتحجج بأي حجة
هجيب فتوى علماء الأزهر الأول

ركزوا معايا كويس في كل كلمة فيها
#3

ودي فتوى الرأي الآخر اللي بتحرم التهنئة بتصرف
#4


معقولة لسه بنشوف مسلمين حريصين على شجرة الكريسماس ؟
معقولة لسه بنشوف مسلمين بيعملوا حفلات ورقص وغناء ويطفوا النور ويستنوا الساعة 12 ؟
معقولة لسه مسلمين بيقولوا وفيها ايه يعني لما أحتفل مع زوجي وأولادي من غير ما أعمل الحرام ؟
معقولة الواحد يخرج يلاقي المحلات كلها مليانه حاجات تخص الكريسماس؟
معقولة الواحد يفتح التلفزيون يلاقي كل حاجة عنه حتى الطبيخ ؟


فين هويتنا الإسلامية ؟ياترى لو الرسول صلى الله عليه وسلم والصحابة مشيوا في شوارعنا وعاشوا وسطنا ليلة راس السنة الميلادية هيقولوا احنا في بلاد المسلمين ولا بلاد الروم والفرنجة ؟

لامتى هيبقى التساهل في ديننا وعقيدتنا في كل حاجة في حاتنا وعايزين ربنا يصلح حالنا ؟
المسلمون راس السنة عندهم هو راس السنة الهجرية فقط
وملناش دعوة براس السنة الميلادية

الموضوع مش مسألة احتفال وهيعدي
الموضوع اكبر من كده بكتير
المهم المعنى اللي ورا الاحتفال ده

الموضوع هو عقيدتي
هو ايماني بالله سبحانه وتعالى وحده ورفض إني أحتفل بميلاد ابن وشريك له في العبادة
هو عدم إقرار غيري على عقيدته الخاطئة
هو عدم تقوية الباطل وإظهاره
هو تمسكي بهويتي
هو اعتزازي بديني
هو امتثالي لأوامر ربي
هو إن ديني خط أحمر مأتنازلش عنه ولا أخجل إني أقول لأي حاجة تمس عقيدتي لأه



عارفين مشكلتنا إيه ؟
مشكلتنا في كذا حاجة
1- إننا اتربينا على حاجات مخالفة للشرع
ولما بنسمع حد يقول حاجة غريبة عن اللي اتعودنا عليه بيكون في نظرنا متشدد ووحش ومش فاهم وجاي بدين جديد
ونسينا قوله تعالى : (وَكَذَلِكَ مَا أَرْسَلْنَا مِنْ قَبْلِكَ فِي قَرْيَةٍ مِنْ نَذِيرٍ إِلَّا قَالَ مُتْرَفُوهَا إِنَّا وَجَدْنَا آبَاءَنَا عَلَى أُمَّةٍ وَإِنَّا عَلَى آثَارِهِمْ مُقْتَدُونَ )

2- التقليد الأعمى لكل حاجة حوالينا من غير تفكير ومن غير ما نشوف موافقة للشرع ولا لأه
ونسينا قوله صلى الله عليه وسلم : ( لتتبعن سنن من كان قبلكم ، شبرا بشبر وذراعا بذراع ، حتى لو دخلوا جحر ضب تبعتموهم . قلنا : يا رسول الله ، اليهود والنصارى ؟ قال : فمن؟ ) ، صحيح البخاري

3- والأهم إن كتير مننا فقد تعظيم حرمات الله
ونسينا قوله تعالى : ( ذلك ومن يعظم حرمات الله فهو خير له عند ربه )
أصبحت كلمة حرام عادي خالص
الواحد المفروض يسمع كلمة حرام جسمه يقشعر ويخاف خصوصا لو كان الحكم مقترن بكلام علماء
لكن احنا عادي خالص بالعكس بنتنرفز علشان مش بنحب حد يقول علينا بنعمل حاجة حرام فبنعند ونحاول نبرر ونثبت على الأقل قدام نفسنا إنه مش حرام واللي قدامنا هو اللي غلط

يارب اصلح حال المسلمين وردهم على دينك ردا جميلا
اللهم حبب إليهم الإيمان وزينه في قلوبهم