مسلسل في كل بيت حكاية... الحلقة التاسعة
الحلقة التاسعة :
نرجع لشلبية واختها والبيت اللي هيتبني
شلبية وهي بتضحك : بيت ايه اللي هيتبني يا منمن ناوية تطلعي مهندسة ولا ايه ؟
منى : لا يا خالتو ، تعالي ابني معانا بيت كمان وهنادي على الكل علشان نبني بيوت كتير
وجريت منى تنادي اخوها وأولاد خالتها
بسرررررررعة جرررررررررري كله يجي علشان نبني بيت
جه الكل بيجري علشان يعرف فيه ايه
وشلبية قاعدة تبص باستغراب على اللي بيحصل
أما فوزية قعدت الأولاد حواليها
وقالت : مين عايز يبني قصر في الجنة ؟
كله قال: أنااااااااااااا
فوزية : يبقى نبدأ مع بعض نقرأ سورة الإخلاص 10 مرات
يقول صلى الله عليه وسلم :
كله قعد يقرأ لغاية ما خلصوا.
فوزية : ايه رأيكم نزين القصر ده بشجر حلو ؟
ريم : ازاي يا خالتو؟
فوزية : بسيطة يا حبيبتي ، غرس الجنة سبحان الله و الحمد لله
و لا إله إلا الله و الله أكبر ، وعلى قد ما تقوليها على قد ما تغرسي شجر في الجنة .
تيجوا نغرس 100 شجرة واحنا قاعدين ؟
وكله بدأ يغرس شجر ليه في الجنة
شلبية: ربنا يكرمك يا زوزو
حسستيني باحساس جميل
الكلام أخدنا ومأكلناش حاجة
وقامت عملت واجب الضيافة وقضوا ليلية جميلة مع بعض
**************
طلع النهار والصبح شقشق وكله جهز حاجته ورايح على مدرسته
وشلبية قالت لريم : ملحقناش نتتكلم ونتفق هتعملي ايه
متتهوريشواستني لما نتكلم
سامعة ياريم ؟
ريم : حاضر يا ماما
لكن كانت ناوية على حاجة تانية خالص
********
أم منال صحيت من النوم وقالت لمنال تعالي نتكلم شوية مع بعض علشان لازم أروح اتأخرت على ابوكي كده وزمانه محتاس
منال : ههههههههههه
اتحججي بقى تلاقيه وحشك ومش قادرة تنامي الليل من غيره
أم منال : ايوه طبعا ، ربنا يخليه تاج فوق راسي
تعالي نتكلم جد بقى
أنا قعدت مع حسن وحكالي على اللي مضايقه ومش عاجبني حالك!
منال : شفتي عرف يضحك عليكي بكلمتين كالعادة
مش هتنازل عن الطلاق
أم منال : طلاق ايه يا مجنونة ؟
أول ما يتشك بشوكة تتجنني علشانه! وعند اي مشكلة يبقى طلاق !
مفيش حل وسط ؟
الذنب مش ذنبه انتي اللي خايبة ومش عارفة تبقي قد مسئولية الزوجة
منال غاضبة : ماما !
أم منال : بلا ماما بلا بتاع !!
انتي كل تركيزك في ردة الفعل مش الفعل بتقولي زعقلي ورفع صوته وواقفلي على الواحدة
ونسيتي ان ده رد فعل على تقصيرك
لو كل حاجة تمام مكنش حصلت مشكلة
منال: لأه أنا متأكده إنه كان هيدور على حاجة ويتلكك ويزعق!
أم منال : طيب اعملي اللي عليكي وبعدها نشوف هيتلكك ولا انتي ظالماه
وانتي بتشاوري على اللي قدامك بصباع تأكدي إن في 3 صوابع بتشاور عليكي
قبل ما تبصي عمل ايه شوفي انتي عملتي ايه ؟!
منال : طيب وتحكمه فيا ؟ وإنه عايزيني اسمع كل كلمة بيقولها وكأن معنديش شخصية ؟
أم منال : يابنتي الحياة الزوجية حب ومودة مش تنافس وحق مين الأكتر ومين اللي هيكسب وكلمته تمشي !
نقدر نقول إن الزوجين بعد الزواج أصبحوا شخص واحد في جسدين
واللي يألم واحد فيهم يألم الثاني واللي يسعده يسعد التاني
وقبل ما اكون حريص على راحتي اكون حريص على راحة الثاني بنفس القدر
وممكن أتنازل شوية وهو يتنازل شوية علشان نوصل لحل وسط.
منال : بس هو كده بيلغي شخصيتي تماما وأنا مأقبلش كده
أم منال : ليه السفينة ليها ربان واحد ؟ لأن المركب اللي فيها ريسين بتغرق واحد هيقول نزل الشراع والتاني يقول لأه مينزلش وفي الآخر السفينة تغرق لأن مفيش حد ليه كلمة عليها وقت الخلاف كلمته هيه اللي تمشي
ليه في تدرج وظيفي في أي شركة ومينفعش تتخطي مديرك ؟ هل ده في اهدار لكرامة الموظف؟
قبل ما تتزوجي ولما كنتي بتسمعي كلام ابوكي لما يقولك متعمليش كذا واعملي كذا ولما كنتي بتستأذني إنك نازلة تشتري حاجة رايحة المكان الفلاني هل ده اهدار لكرامتك ؟
ولا كنتي بتلبسي وتفتحي باب الشقة وتخرجي براحتك من غير ما تقولي لحد علشان انتي حرة في حياتك ومحدش ليه سلطة عليكي ؟
لما تطلبي حاجة من سندس غصب عنها وتطيعك علشان ترضيكي يبقى ده اهدار لكرامتها ؟
منال : لأه طبعا ده الصح
أم منال : اشمعنى كل اللي فات مش اهدار للكرامة وطاعتك لزوجك اهدار للكرامة ؟
هيفرق معاكي ايه لو قالك حطي الحاجة دي في المكان الفلاني أو مش بحب كذا واعملي كذا
اللي هينقص منك ولا هيتعبك في انك تعملي حاجة زي دي وتريحي بالك من وجع الدماغ قبل ما تريحيه
وبعدين كل واحدة ولازم تعرف شخصية زوجها ومفتاحها
فيه راجل يجي بالحنية ،فيه راجل يجي بإنك تفخمي فيه وتحسسيه إنه مهم وهكذا
جزء كبير من المشاكل في البيت تقدر الزوجة تتفاداها بذكائها في تعاملها مع زوجها
منال : كل حاجة الزوجة الزوجة مجتمع ذكوري صحيح
أم منال بتتنهد : أه ياني !
ومش عيب إن الزوجة هيه اللي لازم تحاول تتفادي المشاكل وتكسب الراجل وتعمل كل حااااااجه عشان الدنيا تمشي والبيوت تستقر ، لأن دي طبيعة المرأة الحنية والاحتواء ودي غريزة ربنا سبحانه وتعالى حطها فيها
هل تعامل الأم مع أولادها زي تعامل الأب؟
أكيد لأه لأن ربنا سبحانه وتعالى جعل من فطرتها الصبر وقدرة التحمل وكمان كله بثوابه
منال بصت في الآرض ومش عارفة تقول ايه
أم منال : فكري في الكلام اللي قلتهولك
زوجك ابن حلال ولو ريحتيه هتشوفي الخير كله يا بنتي
اقوم بقى علشان اتأخرت
ومش عايزة أسمع أي شكوى منك ولا منه تاني
*************
الولاد رجعوا من المدرسة
وشلبية لاحظت ان ريم مبسوطة
شلبية : خير مالك مبسوطة كده ؟
حصل حاجة ؟
ريم : حصل حاجات كتيررررررررررر
تعليقات
إرسال تعليق