مسلسل في كل بيت حكاية ... الحلقة الرابعة
الحلقة الرابعة :
رن جرس التليفون في بيت أهل منال
أم منال : السلام عليكم ورحمة الله وبركاته.
منال وهي بتبكي : وعليكم السلام ورحمة الله وبركاته.
أم منال مخضوضة : مالك يا بنتي إيه اللي حصل؟
منال : تعالي انتي وبابا أنا خلاص معدتش قادرة استحمل تعالوا خدوني عايزة اتطلق
أم منال : أعوذ بالله من الشيطان الرجيم!.
طلاق إيه بس يا بنتي اهدي كده.
وإن شاء الله هنيجي نشوف الموضوع ومتعمليش ولا تقولي حاجة لحسن لغاية ما نيجي !
حطت السماعة وهي بتقول إنا لله وإنا إليه راجعون وسمعها أبو منال.
أبو منال: خير إيه اللي حصل؟!
أم منال : كالعادة منال ربنا يهديها في مشكلة وعايزانا نروح لها
أبو منال غاضبا : هي مش هتعقل ابدا ؟ لو رحت هكسر دماغها ومش فاضي للدلع بتاعها كل شوية
روحي انتي الله يكرمك وعقليها،أنا مش عارف طالعة لمين بدماغها دي
أم منال : ادعيلها ربنا يهديها ، عموما الوقت اتأخر دلوقتي والمكان بعيد مش هأعرف أروح لوحدي الصبح بدري أروحلها إن شاء الله.
- لكن كانت قاعدة وقلبها مع بنتها -
***********
في بيت شلبية جلسة عائلية يومية قبل ما يناموا بيحكوا اللي حصل معاهم خلال اليوم ويضحكوا مع بعض
هند : على فكرة أنا أشطر واحدة فيكم خلصت الواجب بتاعي بسرعة فائقة
في ثانية ربع
شلبية ضاحكة : يعني ايه ثانية ربع ؟
اسمها ربع ثانية يا حبيبتي
هند ضاحكة : الحقوا ماما بتشقلب الكلام
الجميع يضحك وزغلول بيغمز لشلبية وبيقول لهند: هذا الشبل من ذاك الأسد
طالعة لمامتك مش بعرف اخد منها جملة مفيدة على بعض!
شلبية : المشكلة عندك أنت , مش عارفة تتأقلم مع مستوايا العقلي العالي
نقول ايه بس دي ضريبة العبقري.
زغلول : ماشي يا عبقرية.طيب يعني إيه غسيل أموال ؟
شلبية : ودي عايزة فكاكة ؟
يعني الفلوس القديمة نحطها في الغسالة تطلع جديدة لانج
وانفجر الجميع بالضحك
خالد : أنا عندي اقتراح!
نعمل يوم بابا وماما يحكولنا فيه على ذكرياتهم
زي مثلا كانوا بيطلعوا الكام في المدرسة
زغلول : اه يا لئيم ، كنا بنطلع الأوائل طبعا
شلبية : طبعااااااااااااااااااااااااااااااااااااااااااااااا ااااااا
ده جدكم كان بياخد مني الكتاب ويقولي كفاية مذاكرة
عقبال ما أشوفكم ماسكين كتاب
خالد : يا ماما !
زغلول : بس تعرف يا واد يا خالد
فكرة حلوة أنا أؤيد الاقتراح ونخليه يوم الجمعة
لكن دلوقتي كله على سريره وراكم مدارس الصبح
كله قام يبوس راس زغلول وشلبيه ويروح لسريره
زغلول وشلبية : تصبحوا على الخير
ومتنسوش تقولوا أذكار قبل النوم
**********
بدأ صباح يوم جديد وشلبية بتسلم على الأولاد
وشوشت ريم وقالتلها
متنسيش اللي اتفقنا عليه حاولي تعرفي ايه سبب زعل صحباتك منك
ريم : انتي لسه منسيتيش!! حاضر يا ماما.
**********
رن جرس الباب عند منال أم سندس من بدري
فتحت منال الباب وأول ما شافت والدتها قعدت تعيط وتقول الحمد لله إنك جيتي
أنا مجهزة هدومي أنا والبنت علشان نيجي معاكي
تعليقات
إرسال تعليق