عقلي يوزن بلد ومش مقتنعة مهما كان دليلكم !
تعالو نتكلم شوية عن العقل كلام بالعقل
العقل اللي حير ناس كتير وهيوديهم في داهية
واعذروني لو شديت عليكم شوية لأني بحبكم وبخاف عليكم
حاجة لفتت نظري الفترة اللي فاتت سواء في التعليقات على المواضيع في القسم الإسلامي أو الحوارات بين البنات
بنشوف تعليقات كتيرة لما يثار حكم معين في حاجة مش جاية على هوانا
ومع الحكم ورأي العلماء بيكون الدليل من القرآن والسنة
بل احيانا بيكون مذكور الخلاف في الحكم بين المذاهب
لكن بيكون رفض مطلق واستياء وهجوم لمجرد إن الرأي اللي مش جاي على هوايا مذكور حتى وإن كان هو الرأي الراجح وأدلته اقوى
ويبقى هناك مطالبة بمسح الرأي الآخر
وجدال وخناق واتهامات بالتشدد
خصوصا في مسائل زي الختان والنقاب وحكم الموسيقى والغناء
وتنقسم الأراء ما بين إنكار تام للحكم أو اتهام بالتشدد والغلو
ونسمع كلام زي :
مش مقتنعة
العقل بيقول كذا
ده تشدد
نقول الأئمة الأربعة قالوا
تقول دول بشر عندهم عقل وانا عندي عقل زيهم مش أحسن مني في حاجة علشان أنفذ أقوالهم
وبنشوف تعليقات أصعب من دي للأسف
وكلام كتير وكبير والأهم من ده كله
خطيررررررررررررررررررررررررررررررررررررررررررررررر ررر
أيوه خطير على دينك
ربنا سبحانه وتعالى أعطانا العقل وأمرنا بالتفكر والتدبر وإننا نشغل عقلنا
لكن لأن العقل وحده لا يكفي أرسل الرسل وأنزل الكتب علشان نعرف الأوامر الإلهية اللي تخلي حياتنا ماشية صح
ولو كان الدين بالعقل أو لو كانت معرفة الله سبحانه وتعالى بالعقل فقط
مكناش هنلاقي علماء ذرة وناس طلعوا القمر ولسه بيعبدوا بقرة
او بيسجدوا لصنم
إذاً عبارة ربنا عرفوه بالعقل غير صحيحة شرعا
لأن العقل وحده لا يكفي إننا نعرف الله سبحانه وتعالى ونعرف صفاته وافعاله
ووظيفة العقل هي فهم النصوص وليس الحكم عليها
فالعقل مش علشان اقول مقتنعة بالحكم ده ولا الحكم ده
لما بتشتري أي حاجة جديدة موبايل حديث لسه نازل جديد ولا تلفزيون ولا
مكنسة ولا اي جهاز كهربائي متطور شوية وفيه حاجات جديدة أول مرة تنزل
بترمي الكتالوج وتقولي انا عندي عقل وهأعرف أشغله لوحدي
ولا بتقرأي التعليمات وتنفذيها ؟
والا الحاجة بتبوظ لو شغلتيها غلط او على الأقل مش بتعمل بكفاءة ؟
ربنا سبحانه وتعالى اعلم بما يصلح لعباده واللي ينفعهم لغاية يوم القيامة
وبعدين مش إنتي عندك عقل زي عالم الدين وكلامه ميمشيش عليكي؟
لما بتروحي للدكتور وبيكتبلك دوا
ولا بتروحي للمهندس يبنيلك بيت
بتاخديه ليه ؟ ولا بتبني البيت زي ما قالك بالظبط ومش بتغيري في نسب الأسمنت والحديد ليه ؟
انت مش عندك عقل فاهم وبيعرف يفكر ودول بشر زيهم زيك ؟
مش عقلك هنا هو عقلك هنا كمان ؟
ولا الدين حاجة سهلة نلعب فيها ونتكلم فيها على مزاجنا
خلاص مادام الدين بالعقل بقى نلغي الأزهر وكليات الشريعة وأصول الدين بفروعهم
ده لو واحدة مش بتفهم في الكورة وجت علقت تعليق غلط تلاقي اللي حواليها بيقول اللي متعرفيش فيه متفتيش فيه
ده كورة مينفعش نغلط فيها
لكن ينفع نبقى 90 مليون مفتي
انتي عارفة علشان عالم يستنبط حكم لازم يكون عارف إيه ؟
1- إحاطة المجتهد بمدارك الأحكام المثمرة لها من كتاب وسنة وإجماع
واستصحاب وقياس ومعرفة الراجح منها عند ظهور التعارض وتقديم ما يجب
تقديمه منها كتقديم النص على القياس .
2 - علمه بالناسخ والمنسوخ
ومواضع الإجماع والاختلاف ، ويكفيه أن يعلم أن ما يستدل به ليس منسوخا ،
وأن المسألة لم ينعقد فيها إجماع من قبل .
3 - معرفته بالعام والخاص والمطلق والمقيد والنص والظاهر والمؤول والمجمل والمبين والمنطوق والمفهوم والمحكم والمتشابه .
4 - معرفته بما يصلح للاحتجاج به من الأحاديث من أنواع الصحيح والحسن
والتمييز بين ذلك وبين الضعيف الذي لا يحتج به ، وذلك بمعرفته بأسباب الضعف
المعروفة في علم الحديث والأصول .
عندك كام علم من دول علشان تتكلمي وتجادلي وتقولي مقتنعة ولا مش مقتنعة بالحكم وده تشدد ؟
كتير مننا يمكن اول مرة يسمع اسم بعض العلوم دي أصلا
ليه دين ربنا سهل علينا ؟
ليه لو حد قالك اللي إنتي لابساه ده مش حجاب تقولي تشدد ؟
ليه لو حد قالك إن إجماع الأئمة الأربعة ورأي جمهور العلماء بيقول إن
الموسيقى حرام حتى لو فيه بعض اباحه بشروط وحد كتب الحكم ده يبقى تشدد ؟
ليه لو حد قالك الختان سنة أو على الأقل مشروع في حق النساء ويجيبلك الدليل تتعصبي والدنيا تتقلب ؟
ليه لو لقينا رأي راجح ورأي مرجوح معندناش أي رغبة في إننا نرضي ربنا
وناخد بالأحوط ونتعبد ربنا باللي يرضيه حتى لو كان مش على هوانا أو فيه
صعوبة على نفسنا ؟
ونفضل نجادل ونتهم اللي قالوا الرأي الراجح إن ده تشدد ؟
على الأقل اخدتي برأي مرجوح أو ضعيف أو قلة من العلماء قالوه متجبريش غيرك إنه ياخد برأيك وتتهميه كمان بالتشدد
الدين مش بالعقل ولا بالهوى والا يبقى دين الهوى
يقول الله تعالى : " وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم "
ويقول تعالى : " فلا وربك لا يؤمنون حتى يحكموك فيما شجر بينهم ثم لا يجدوا في أنفسهم حرجا مما قضيت ويسلموا تسليما "
مش يحكموا بس لاه ويرضوا كمان
مش اللي يجي على هوايا يبقى حلو وكيوت ودين يسر وجميل واللي ميجيش على هوايا يبقى تشدد وتنفير من الدين ومش مقتنعة
يقول الله تعالى عن بني إسرائيل اللي عملوا كده : " أفتؤمنون ببعض الكتاب وتكفرون ببعض "
عارفين عاقبتهم كانت إيه ؟
" فما جزاء من يفعل ذلك منكم إلا خزىٌ فى الدنيا ويوم القيامة يُردون إلى أشد العذاب وما الله بغافل عما تعملون "
طيب ليه ؟
" أولئك الذين اشتروا الحياة الدنيا بالآخرة فلا يخفف عنهم العذاب ولا هم ينصرون "
عقلي غير عقلك غير عقل فلانة غير عقل علانة
واللي أنا أشوفه صح ممكن غيري يشوفه غلط
واللي بالنسبة لي تشدد عند غيري تساهل والعكس
يبقى انهي راي فينا هو الدين ؟ ولا هيبقى دين خاص لكل واحد فينا ؟
لو كانت أحكام الدين بالعقل مكناش في المسح على الجوارب بنمسح على الشراب من على القدم من فوق
العقل بيقول اننا كنا نسمح من تحت القدم
هيفضل حاجة مهمة بتدور في أذهاننا
مش الحديث بيقول استفت قلبك ؟
استني بس انتي عارفة معناه إيه ؟
المراد
من الحديث أن المؤمن صاحب القلب السليم قد يستفتي أحداً في شيء فيفتيه
بأنه حلال ، ولكن يقع في نفس المؤمن حرج من فعله ، فهنا عليه أن يتركه
عملاً بما دله عليه قلبه .
ده المفتي قاله إن ده حلال بس من جواه حاسس إن فيه شبهة أو إنه حرام فيسيبه
مش المفتي يقوله حرام يقول لأه قلبي بيقول إن ده حلال
اللهم اجعلنا ممن يعظم شعائر الله
اللهم رد المسلمين غلى دينك ردا جميلا
اللهم اجعلنا ممن يستمعون القول فيتبعون أحسنه
***
توضيح مهم يُرجى قراءته ← #22
تعليقات
إرسال تعليق