حكاية من حياتنا ( الحلقة الثالثة )
ريم راجعة من المدرسة حزينه وساكتة مش زي عوايدها
شلبية: مالك يا ريم حصل حاجة النهاردة ؟
ريم : النهاردة سمعت قصة اثرت فيا اوي
شلبية : خير ؟!! صلي الظهر ونتغدى وبعدين نقعد وتحكيلي ايه اللي حصل معاكي
وبعد ما امتلأت البطون والتنك اتملى وشربوا الشاي شلبية راحت لريم تسألها ايه اللي حصل
شلبية : ها يا ستي ، احكي يا شهرزاد كلي آذان صاغية
ريم : النهاردة جاتلنا مدرسة انجليزي من المدرسات العملي اللي بيجوا يتدربوا عندنا اسمها إيمان
وحكتلنا قصتها وكانت قصة عجيبة
وبدأت ريم تحكي القصة على لسان إيمان
(ايمان....اسمي ايمان....وانا في ستة إبتدائي كنت وقتها بأكره الدنيا كلها....
نشأت وانا طفلة مع ام طيبة متفرغة لتربيتي انا واخواتي كمال الاكبر مني ونيرة الاصغر مني....ماما كانت طيبة بس انا كنت شقية وبأتحرك كتير. ..ماما كانت بتقول لي كده غلط كده عيب....اكتر ما بأسمع منها اي كلام تاني....حقيقي مكنتش فاهمة ليه لما اطنطط غلط ليه لما اجري غلط ؟؟؟
كمال ونيرة مش حركيين مش اشقيا كانت ماما بترتاح لهم ....اما انا كانت دايما متضايقة وبتعيط مني....وانا سني 5 و6 مكنتش بافهم ليه ..وكنت ساعات باحاول اقعد ساكتة...بس بتضايق اوي فلما اقوم اطنطط ماما تنهار....
بابا اقترح اني اروح رياضة....رحت جمباز وانا سني 6 بس للاسف الكابتن كان بيشتم كتير وبيزعق مكنتش بأحب اروح.....
في المدرسة كمان كل شوية استدعاء لماما ايمان شقية....
وماما تقعد تقولي كلام صعب مش فاكرة منه غير"انت دايما عاملالي مشاكل ..ليه كده...انت مش زيينا"
كلامها كان بيغيظني اوي....
بدأت تضربني وانا عندي 7 سنوات
انا من وسط اخواتي
كانت بتضربني وتعيط.....
ضربها مكانش جامد
بس كان بيغيظني اكتر...
كنت باتظاهر انه مش هاممني ضربها..وانا باتقطع من جوايا...
بطلت اذاكر مش انا كده كده وحشة
درجاتي سيئة...
بابا كمان بيضربني
محدش بيحبني...
في سنة خامسة ..اتعرفت علي وسام
وسام مش شاطرة وجريئة اوي...
صاحبتها جدا...
وسام شجعتني ان احنا ناخد حجات من كانتين المدرسة والراجل مشغول في الزحمة....
اترددت شوية...
وبعدين افتكرت ان وسام هي الوحيدة اللي بتحبني ....
سمعت كلامها
اخدنا كيسين شيبسي...
بعد كده..
بقينا بناخد اللي احنا عاوزينه وقت الزحمة...
بعدها...مرة الراجل شافنا
استدعاء اولياء امورنا...
وسام ابوها مجاش....فصلوها يومين محدش سأل من عيلتها
لكن انا...
بابا كان وشه احمر جدا وهو بيسمع..وماما كانت محرجة جدا...
مش قادرة اوصف اللي حصل...
بابا كسر جسمي مضربنيش
كنت بالنسبة لهم عار ع الاسرة
ماما بتقول (ده احنا عمرنا ما دخلنا المدرسة غير عشان يكرموا اخوكي دلوقتي بسببك كله بهدلة)
بأكرهكم.....صرخت....
بابا زود الضرب
يومان غايبة ف البيت....
ولما روحت
محدش من البنات عاوز يكلمني...
خلاص احسن
اكلم الولاد
بدأت اصاحب وانا في ستة ...
صاحبت ولد في اولي اعدادي....
كان عبيط فعلا...
بس اهوه...اللي راضي يكلمني....
ماما عرفت من الاخصائية...
كالعادة
صراخ..وضرب...
منها ومن بابا...
ماما تقول (انت بلاء)
وبابا يقول (اقتلك وارتاح منك )
وانا باقول اكرهكم
لا جديد
سوي اليوتيوب...
مرة كده شفت مشهد امممم
وبعدين بقيت بأشوف...
بابا ضربني تاني وتالت ...
ماما منهارة...ودايما تعيط....
انا مش بأحبهم خالص...
طول عمري بيعاملوني وحش جدا....
انا بالذات...
بابا اخدني لدكتور نفساني
قال اني مضطربة واداني دوا وبابا خاف من الدوا....
في كل المناسبات بأحس انهم كانوا بيتمنوا موتي....
كمال بيصلي
ونيرة
لكن انا ﻷ
من باب العند معاهم مش بأصلي...
مستر الدين اسمه مستر عماد...
كان بيسألنا مين بيصلي؟؟
وبيكلمنا عن الصلاة....
انا قلت مش بأصلي...
سألني ليه؟
قلت له عشان بأكره بابا وماما....
اجابتي كانت غريبة
وسط اجابات تانية كسل او ...بيقطع في الصلاة
قال لي تعالي لي في الفسحة....
مرحتش...
الحصة اللي بعدها
سألني ليه مجيتيش؟؟
مردتش....
ابتسم...
مش بتريقة...
وسام قالت لي انه سأل عني البنات وانا غايبة وقالوا اني اسوأ بنت في الفصل....
ناداني وانا في حصة الالعاب...
تعالي واستئذن مدرسة الالعاب...
قلت له : ايوة يا مستر؟
قال لي (ليه قلتي لي انك بتكرهي بابا وماما؟)
قلت بلا مبالاة (عشان مش فاهمني ....ينفع امشي بقه؟)
ابتسم....
قلت له (ايه اللي بيضحك ؟)
قال (شايفك زعلانة اوي)
قلت له (اللي بيتعامل زيي لازم يزعل)
قال لي(قصدك ايه؟)
قلت له (ضرب وزعيق )
ينفع امشي بقه؟
ابتسم...
قال لي اتفضلي....
مش عارفة ايه اللي حصل بس مستر عماد...
بدأ في حصته..
يكلمني
يطلب مني مسح السبورة..
او توزيع شئ
كمان لاحظت ان مراته ميس فاطمة مدرسة العربي بتعمل كده...
ساعات ...كمان تجيب لي توك او وردة....
كنت باستغرب
وبعدين شكرت ميس فاطمة...
وشكرته...
حصة الدين والعربي
معدتش باتضايق....
باحاول اركز....
بجاوب
بيفرحوا بيا اوي....
؟!
انا حد بيفرح بيا ؟
مستر عماد اصر اني اقرأ القرآن في اذاعته....
انا ؟؟؟؟
لا مرضيتش..
بس هو اصر
الفصل اتريق...
مستر عماد سكتهم بحزم...
فعلا قرأت...سورة الفجر بصوت مرتبك....
ميس فاطمة ومستر عماد شجعوني...
مستر عماد قال لي (عاوزين نبقي النفس المطمئنة )
اندهشت...يعني ايه؟؟
قال لي (نقرب من ربنا؟؟)
عمري ما فكرت في ربنا...
الا من باب اغاظة بابا وماما....بعدم الصلاة....
ماما بتبكي دايما وبتاخد مهدئات بسببي
وبابا متعصب....
مستر عماد قال لي ان ربنا رحمته كبيرة اوي .....
هو بيصلي
وميس فاطمة بتصلي...
بس متجوزين من 10 سنوات ومعندهمش أولاد. ..
ميس فاطمة قالت لي انتي بنتي
فرحت شوية....
معرفش ايه اللي حصل
المدرسين بدأوا يتحسنوا معايا....مستر عماد كلمهم مثلا؟؟؟
سألته
قال لي بصراحة (ايوة انا شايف فيكي خير ومش عاوز حد يهينك )
انا....خير......؟
قلت له (يا مستر انا بأسرق....وكمان بأغش في الامتحانات....وماما وبابا بيكرهوني )
مكنتش باعيط...
بس كنت نفسي اعيط....
فاجأني رده....
(وانا كمان كنت كده)
(حضرتك مش ممكن ؟؟؟؟؟؟)قلت له كده...
قال لي بصدق (والله كنت كده......بس فيه حاجة غيرتني.....)
كان نفسي اعرفها بس جرس البريك رن...ولازم نطلع الفصل....
في اليوم التالي
دورت ع المستر...
كان واقف مع تانية تالت في الملعب بيكلمهم ....ابتسم
قال لي (تعالي يا ايمان )
حكي لي (انا كنت زيك بالضبط وليا كمان واحد صاحبي اسمه معتز ...كان صديقي اوي نغش سوا وكل شئ سوا.....لحد...ما....انا ومعتز عملنا حادثة كانت عربية مامته....وكنا في ثانوية عامة....)
قلت له (وبعدين ؟)
قال لي (معتز مات ...وانا ﻷ
ساعتها فكرت كتير في ربنا.....
كلامه هزني....
دمعت عيوني..
وهو بيوريني صورة معتز...في محفظته...
لكن اكتر شئ فرحني لما
مستر عماد عمل استدعاء لبابا وماما. ..جم خايفين
وشكر فيا امامهم....
هو وميس فاطمة....
بابا سكت مذهول...ماما ...سكتت...
بعدها مستر عماد قالي روحي فصلك....
وكمل هو قعدته معاهم....
شفته من زجاج....الشباك.....
كان بيتكلم باخلاص...اوي....
ماما وبابا ساكتين....
كنت عاوزة ادعي ربنا يدخل مستر عماد الجنة عشان هو اول حد طيب اقابله في حياتي.....
بس انا مش بأصلي....
اتوضيت في الفسحة وصليت عشان ادعي له
وسام مندهشة....
لما روحت
بابا وماما كانوا ساكتين....
فوجئت بماما تحضني في اليوم التالي !!!!!!
وبابا عزمني ع الغدا.....
قال لي في تأثر (مستر عماد دارس وفهمني نمط شخصيتك يا ايمان وانك حركية ومكنش يجب اضربك خالص....انا اسف...)
مين ؟
دموعي سالت امام بابا لاول مرة.......
(يعني ايه انا مطلعتش وحشة ؟)
بابا طبطب علي....
قال لي (مستر عماد قال لي ان الحركي بيتنطط وبيتحرك ومش هادي...وان ضربه اساءة ليه )
رددت (يعني انا مش وحشة ؟)
بابا بكي...
كان شكلنا غريب...
شكرا يا مستر عماد..
انك قلت لهم اني مش وحشة....
رحت له.....
ابتسم
عيطت
قلت له (انت الوحيد اللي افتكرني مش وحشة )
تغيير في المعاملة..
ماما بتحضني
وبابا كمان..
وساعات نيرة
الحضن بيحسسني بحبهم....
بأصلي والله عشان ادعي لمستر عماد
بس فجأة فكرت ان ربنا اللي ارسله ليا...
هأصلي عشان ربنا يرضي عني....
يااااااه...علاقتنا اتغيرت انا وبابا وماما رجعت لهم ..بقلبي بدأت اسمعهم واستجيب لهم..
القرب من ربنا غير كتير في اخطائي....
حاولت مع وسام ..بقينا بنصلي ....
ماما بتحترمني وتاخد رأيي...اتغيرت الامور كتير
انا الان عمري 25....
مدرسة انجلش..
مستر عماد كبر ...وميس فاطمة....كمان ...مخلفوش.....غيري انا...... البنت الفاشلة اللي وقفوا جنبها وهي بتسأل عليهم بعد ما كبروا وكبرت و حافظة جميلهم....
شلبية وريم مش قادرين يمسكوا نفسهم من العياط بعد ما ريم خلصت الحكاية
ريم: ليه يا ماما ابوها ومامتها عملوا فيها كده ؟!
شلبية : طيب ليه يا ريم جبتي الغلط عليهم لوحدهم ؟؟؟
بصي يا حبيبتي صحيح هما غلطانين علشان معرفوش يفهموا بنتهم ويتعاملوا معاها
لكم هما كانوا بيحبوها مكنوش بيكرهوها وكانوا عايزين مصلحتها لكن هي مقدرتش تفهم ده
بدليل ان اخواتها كانت علاقتهم طيبة بيهم
وإنهم لما حد وجههم اتغيروا
يعني مش وحشين لكن حلقة التواصل بينهم مفقودة وكانوا لازم يدوروا عليها
ولو فهمت ده كانت بصيت للأمور بنظرة تانية وتقبلت منهم
ومكنش مشيت في طريق غلط لمجرد العند معاهم وكانت النتيجة انها خسرت كتير
ريم : بس يا ماما فيه اباء فعلا وحشين وقاسيين
شلبية: أكيد فيه لاننا بشر والبشر فيهم الحلو والوحش ومحدش بيختار والده ووالدته
لكن بيقدر يختار يكون هو وحش ولا حلو
ابن نوح عليه السلام كان كافر رغم غن والده كان نبي
وأبو إبراهيم عليه السلام كان كافر رغم إن ابنه نبي
ريم: كمان يا ماما لاحظت دور وسام في حياتها وازاي كان ليها تأثير سيء عليها
شلبية : برافو عليكي يا ريم
اختيار الصديق ده أهم العوامل في صلاح أو فساد الشخص
تخيلي لو كانت صديقتها عارفة ربنا ودلتها على الخير زي مستر عماد وأبلة فاطمة
كانت حياة إيمان اتغيرت من صغرها وأخدت طريق تاني خالص
قال رسول الله صلى الله عليه وسلم: (إِنَّمَا مَثَلُ الجَلِيسِ الصَّالحِ والجَلِيسِ السّوءِ كَحَامِلِ الْمِسْكِ وَنَافِخِ الْكِير، فَحَامِلُ الْمِسْكِ إمَّا أنْ يُحْذِيَكَ وَإِمَّا أنْ تَبْتَاعَ مِنْهُ وَإِمَّا أَنْ تَجِدَ مِنْهُ رِيحًا طَيِّبَةً، وَنَافِخُ الكِيرِ إِمَّا أَنْ يُحْرِقَ ثِيَابَكَ وَإِمَّا أَنْ تَجِدَ رِيحًا خَبِيثَةً) متفق عليه.
ريم: يعني ايه يا ماما يحذيك ونافخ الكير ؟
شلبية : يُحذِيَك:يعني يُعطيك.ونافخ الكِير: يعني الحداد
ريم : فعلا تشبيه جميل والحمد لله إن ربنا بعت في طريقها مستر عماد
شلبية : واحنا كمان لازم ندور على اللي يدلنا على الخير ومنستخسرش في الناس كلمة طيبة أو نصيحة بحب وإخلاص لأانها ممكن تغير حياتهم
لاحظتي إنها رغم اللي كانت بتعمله عمرها ما حست بسعادة ؟
لأن السعادة الحقيقية في اننا نرضي ربنا
وربنا بيقبل توبة العبد مهما عمل وبيغفر ليه وكمان بيبدل سيئاته اللي عملها حسنات
بس إحنا نتوب ونرجع للطريق الصح
ريم: وايه هي شروط التوبة يا ماما ؟
شلبية : التوبة ليها خمس شروط :
الشرط الأول: الإخلاص وهو أن يقصد بتوبته وجه الله عز وجل.
الثاني: الإقلاع عن الذنب.
الثالث: الندم على فعله.
الرابع: العزم على عدم الرجوع إليه.
الخامس: أن تكون التوبة قبل أن يصل العبد إلى حال الغرغرة عند الموت.
وينضاف شرط آخر يتعلق بحقوق العباد وهو أنه لا بد أن يبذل قدر طاقته ووسعه في رد الحقوق إلى أصحابها،
وهما بيتكلموا خالد دخل يغلس كالعادة
خالد: مالكم تتحدثون الفصحى يا قوم
فينكم ؟؟ بقالكم ساعة عمالين تتكلموا لوحدكم
وناسين إن معاكم بشر في البيتشلبية: امشي يا لمض
أنا جاية وراك اهو
تعليقات
إرسال تعليق